話說有一日陪我朋友去買信紙，我問佢男人老狗買黎做咩，佢話最近識左個筆友，依家都互相寫信比大家。我見咁old school嘅野反而有興趣，就學佢買左啲信紙返屋企，但苦無筆友對像，於是問下係邊到識筆友，佢話求其寫個地址就寄去，睇下人地有咩反應同肯唔肯做筆友。
啊!又幾得意喎!於是上網求其搵個屋村地址就寄去，我寫埋回郵地址比佢回信。後黎一直都無回音，可能人地當我變態佬所以無理我，於是我再搵地址寄多啲出去，終於唔洗一星期，我就收到封回郵信件。
打開一睇，啲字好整齊好靚，而且仲要係女仔黎!天呀!我唔係行運行到咁呀!本來開頭真係純粹解悶搵個筆友傾下計，為平淡嘅生活帶點期待，去Check信箱都Check得密左。傾落我發覺同佢好夾，佢好鐘意唱歌，我問佢平時係咪唱開K，佢話平時都留係屋企，無得出去。我見佢寫住無得出去，我直覺上覺得佢係宅女，家規都應該幾嚴，不過就係咁先正! 咁個女仔先又Pure又True!
唔知點解開始對佢有幻想，好想同佢進一步發展，我知係做筆友大忌，但我都忍唔住想問佢拎Whatsapp傾，點知佢又肯喎!我開心到死，似乎佢對我無咩反感，我地關係又咁好，佢又單身，我相信我地將會有一個好好嘅發展機會。
後來我同佢幾乎每日都傾Whatsapp，大家曖曖味味，我仲要求佢不如錄音唱歌比我聽，但佢唔肯，話有機會先。於是我再進一步行動，想睇佢個樣，你知啦，萬一對方係魯芳，我都要急轉彎先得!
於是擔粗粗咁搵話題問佢:「最近我廋左，我相信你都肥過我!」我故意挑釁。
佢話:「唔信，無人可以廋過我。」
之後我死話係，唔信大家Send相比大家睇下，當我Send完比佢後，佢打左一句:「唔錯。」
見佢話唔錯，我先鬆一口氣，起碼佢無反感，之後佢Send黎，只係見到一個女仔著住白抱，身型真係幾廋，但可以睇得出條女應該幾得!
我:「做咩無樣嘅!」
佢:「你話身型之嘛!所以唔比樣你睇。」
不過唔緊要，我依舊發動攻勢，但日子一長，好似關係無咩進展，於是我決定係情人節比個驚喜對方，我買哂禮物，執正哂自己，決定去佢屋企門口等佢!
當我一路沿住寫信地址去時，我就Whatsapp佢 :「你估我去緊邊?」
佢:「去邊?」
我:「離你嘅地方好近!哈哈!」
佢:「無可能。」
我:「真係喎!愈黎愈近!愈黎愈近!」
佢:「我話無可能就無可能!」
我:「不如咁啦!如果我真係出現係你面前，你一定一定一定一定唔可以走!仲要唱歌比我聽!得唔得!」
當我打完依句後，我心跳加速，因為我怕佢見到我真正個樣後可能反感會即刻走，為左唔想咁嘅情況發生，唯有叫佢答應我唔可以走。
佢:「......」
我:「你淆底呀?哈哈!」
佢:「好，我答應你。」
YESSSSSS!真係天助我也!
但當我沿住地址去時侯，發現原來個屋村無咩街燈，只係隱隱若若聽到有啲住戶係到炒菜，雖然夜晚六點幾，但已經個天黑到無得再黑，我快快步咁行去個地址。發現棟樓連看更都無，於是我慢慢沿樓梯上，因為個地址係三樓，一路行我一路諗:「點解無咩留意到有信箱嘅?」
整條走廊都無人，而且完全無燈光，我心諗個女仔平時點住?
個女仔住係304室，但我搵極都搵唔到304室，只有3A......3B......3C......3D，偏偏無304。而且我發現愈黎愈大風，好似從四方八面吹黎，吹到鐵閘呯呯聲。
我拎個電話一睇，發現無信號，但我硬住頭皮Send Whatsapp去。
我: 「哈哈!我已經到左你門口啦!」
明明無信號，但Whatsapp仍然出現兩個Tick，而且仲見到對方輸入中....
「點解你要黎搵我?」
「無呀!驚喜呀!哈哈!我話左我一定黎搵你啦!」
突然間，我留意到對方個Whatsapp頭像明明係無頭像，依家竟然轉左張圖，於是我即刻禁黎睇下，只係見到個長髮女仔，身穿白抱，但今次影埋個樣，但真係太細張，我Cap圖再慢慢放大....放大....放大....
當我放到最大時侯，我嚇撚到呆左，個心跳得好快，我完全手軟腳軟。
因為我見到個女仔無樣......
突然Whatsapp響起，整個手機震左一震，我慢慢咁打開黎睇
「我答應過你，我一定唔會離開你，仲會唱歌比你聽.....嘿嘿。」
突然間，我感覺到身後有股寒氣，之後聽到一把好淒美嘅女仔聲係到唱
" 重飾演某段美麗故事主人~~ 飾演你舊年共尋夢的戀人 "
當我熜左個Whatsapp時，手機螢光幕關上，從機面隱隱若若反光到我身後有個人......我慢慢......慢慢....轉身一望............
Search